ತೊಂದರೆ

ಕಾಲ್ಬೆರಳ ಸಂದೀಲಿ ಸಿಗೋ ಕಲ್ಲು
ಪೆನ್ನಿನ ತುದೀಲಿ ಹೆಚ್ಚಾಗಿರೋ ಇಂಕು
ತಲೆ ಮಧ್ಯ ಕಾಣೋ ಬಿಳಿ ಕೂದಲು
ಮೂಗಿನ ತುದೀಲಿ ಎದ್ದಿರೋ ಗುಳ್ಳೆ
ಪ್ಯಾಂಟಿನ ಜೇಬಲ್ಲಿ ಸಿಗೋ ಹಳೇ ಬಿಲ್ಲು
ಇನ್ನೂ ನೇತಾಡ್ತಾ ಇರೋ ಹಿಂದಿನ ವರ್ಷದ ಕ್ಯಾಲೆಂಡರ್
ಹಲ್ಲಿನ ಮಧ್ಯ ಸಿಗೋ ಬಾಳೇಕಾಯಿ ಚಿಪ್ಸಿನ ಚೂರು
ತುಂಡಾಗಿದ್ರೂ ಇನ್ನೂ ಇರೋ ಹಳೇ ಚಪ್ಲಿ
ಉದ್ದ ಹೆಚ್ಚಾಗಿ ಚುಚ್ಚುತ್ತಾ ಇರೋ ಕಾಲಿನ ಉಗುರು
ಚಾರ್ಜ್ ಆಗ್ದೇ ಇದ್ರೂ ಹಾಗೇ ಇಟ್ಕೊಂಡಿರೋ ಹಳೇ ಚಾರ್ಜರ್
ಗೆರೆ ಬಿದ್ದು ಸ್ಕ್ರಾಚ್ ಆಗಿರೋ ಹೆಲ್ಮೆಟ್ಟಿನ ಗ್ಲಾಸ್
ಒಂದು ಕಿವಿಯಲ್ಲಿ ಮಾತ್ರಾ ಕೇಳಿಸೋ ಹೆಡ್-ಫೋನು
ಎಷ್ಟು ಸಲ ಕೊಡಕಿದರೂ ಬರೀದೇ ಇರೋ ಪೆನ್ನು
ಒಡೆದು ಸೋರ್ತಾ ಇರೋ ಹಳೇ ಬಕೆಟ್
ಕಾಫಿಯಲ್ಲಿ ಸಿಗೋ ಇರುವೆ

ಕೆಲವನ್ನ ತೆಗೆದು ಎಸೆದ ಮೇಲೇ,
ಅದರಿಂದ ಇದುವರೆಗೆ ಅದೆಷ್ಟು ತೊಂದರೆ ಆಗ್ತಿತ್ತು ಅಂತ ಗೊತ್ತಾಗೋದು!